Ariela Dürrenberger - Video Journalischtin vom TeleBasel
   
 

 

Ariela, was isch denn Dyni Uffgoob als Video Journalischtin ?

  Ariela:

Grundsätzlig isch myni Aarbet die glyych, wie die vomene normaale Journalischt, usser as ych au sälber filme kaa. Ych ha glehrt, wie me mitere Kamera umgoot, ebberem s Micro perfäggt aasteggt oder richtig aanehebt, etc. Mänggmool ha n ys Gligg und ka gmainsaam miteme Kameramaa an e Drai, oder y fier das Interview elai duure und film glychzytig... dorum sin mer Video JournalischtInne. Me isch elai underwäggs, recherchiert im Vorus, stellt syni Frooge und schrybt bzw. schnydet dr Byydraag au grad sälber.

     
 

Hesch Du denn scho immer Journalischtin welle wärde ?

  Ariela:

Y glaub, ass das schon immer in mir drinn gsii isch und het sich beraits scho in dr Schuel zimmlig uusekristallisiert. Y bi immer scho e "Wundernase" gsii und ha immer fir alles no e Froog baraat kaa. Noo dr Wirtschaftsmittelschuel (WMS), ha n y e kaufmännischs Praktikum im Büro gmacht und ha denn aaschliessend bi TeleBasel e wyters Praktikum in dr Abdailig "News" in Aagriff nää kenne.

Und wie lang isch das Praktikum bi TeleBasel gange ?
1 Joor... aber y ha beraits scho nooem 1 Daag my eerschts Interview gmacht. Im Lokaal-Journalismus wird me zimmlig schnäll ins kalte Wasser gwoorfe und denn muesch Di halt bewyyse kenne.

     
 

Wie kunnt denn esoone Byydraag z stand ? Isch das e Team wo s Theema mitenand bespricht, oder kasch Du das elai bestimme, was gfilmt wird ?

  Ariela:

S isch baides... in dr Regel bespräche mer Aafangs Wuche, was alles aastoot und denn wärde die Theeme zudailt... woby mer in dr "News" Redaggdioon schaffe und do ka jeede Daag ebbis bassiere, wo me sofort reagiere muess und genau fir daas hänn mer ebber, wo s Daagesgscheh e weeneli im Aug bhaltet.

Das macht e bstimmti Persoon ?
Ich mach das auch... entweder man ist gerade Redaktor oder man ist in Themenkoordination und dann ist es eben auch deine Tagesaufgabe, dass man das Geschehen im Auge behält und für den nächsten Tag die Interviews vorbereitet.

Und wenn zNacht ebbis bassiert ?
Vo uns isch immer ebber im Yysatz... 365 Daag im Joor. Jeede Daag lauf ebbis iibere Sänder, wo am glyche Daag produziert woorde n-isch.

     
 

Und denn goots loos... wie lauft esoone Daag vonere Produggdioon ab ?

  Ariela:

Am 09:00 am moorge drifft me sich mitem Produzänt oder dr Produzäntin zer Besprächig, wo drfiir zueständig sin, ass gnueg Byydrääg fir d News-Sändig am Oobe vorhande sin. Aaschliessend schwäärme d ReporterInne uss, mache ihri Inteviews und kemme wider zrugg, loose ihre Byydraag noonemol aa und schryybe s Script fir dr Produzänt oder d Produzäntin. Wird dr Byydraag als "Guet" befunde, goots ab in Schnitt.

Und wär schnyydet dr Byydraag ?
Mer hänn Lyt, wo d Byydrääg perfäggt schnyyde und mitem Doon abmische kenne... aber mer sitze immer näbedraa und bestimme, wie mers gärn hätte. Drnoo goot dr Byydraag ins "Doonkabiinli" und wird mit unserer Stimm verdoont, wird denn noonemol abgnoo und lauft denn iiber dr Sänder. Am Schluss muess me no dr entsprächend Artiggel fir telebase.ch schryybe.

Dasch jo eggsdreem vyylsytig...
Dorum sait me au, ass me bimene Lokaalfärnseh am maischte lernt.

     
 

Mit Dynere Summerseerie «Vo Schönebuech bis Ammel, vom Bölche bis zum Rhy», hesch zimmlig vyl KM laufe miesse. Welle Ort het Dir denn am beschte gfalle und wieso ?

  Ariela:

Also am beschte gfalle het mer d Brauerey, wo mer ganz am Schluss glande sin ;-)

Das glaub y...
In dr Brauerey isch aine zem Interview koo, wo mer 2 Wuche voorhäär no e Kaffikurs gää het und das ha n y so luschtig gfunde... im Lokaaljournalismus drifft me d Lyt iiberall immer wider aa.

Aber au doo hesch jeede n-Oort sälber ussgwählt und die Seerie mitgstaltet ?
Jä alles sälber blaant, aber mer hänn seer wenig Zyt ka... also 1 Daag zem blaane, 1 Daag firs Draie und 1 Daag zem schnyyde, s isch ächt e Marathon gsii.

     
 

Was schetzisch Du denn am maischte bim Färnsehsänder "TeleBasel" ?

  Ariela:

Näbscht dr Vyylsytigkait vo mym Job, griegt me mit dr Zyt au e n-unglaubligs Allgemainwisse. In mym Alter setzt me sich sunscht aigentlig nit mit so gsellschaftligge Brobleem ussenand, wo grad bassiere.

Und me griegt au alles mit, wo grad in dr Stadt bassiert...
Absolut... und me verstoot au vyyl besser, wie zem Byspiil e Unternämme funggdioniert, etc. und ka au in mym Frindesgrais vyl besser und fundierter argumendiere.

     
 

Hättsch Du au emol so richtig Luscht, voor dr Kamera z stoo und z moderiere, wie zB. bi "7vor7" oder eme "Talk" ?

  Ariela:

Wenn me d Sändig "News" moderiere ka, denn isch das scho seer cool, wenn me eso authentisch iiberekunnt... aber me erläbt halt nit, me stoot aifach im Studio voor dr Kamera und liiest dr Täggscht ab. Bi dr Sändig "Talk" ischs scho spannender, well me mit sym Geegeniiber e weeneli spiile und en uusefoordere kaa und das wurd mi eenter raize. Bim "Talk" muess me aifach wisse, vo waas me reedet, sunscht ka das zimmlig schnäll kippe und unagnääm wäärde.

     
     
 

Wie isch denn dr Umgang mit de Moderatoore, zB. em Dani vo Wattewyl, dr Cyliane oder em Chris ?

  Ariela:

Me gseet sich ständig in dr Redaggdioon... dr Dani vo Wattewyl isch esoone tolle Mensch und boodeständig wie d Adela und Cyliane au und schaff seer gärn mitene zämme.

     
 

Du produziersch jo au dr Querschnitt vo de Vorfasnachtsveraastaltige...

  Ariela:

Genau... aber dr Querschnitt vo dämm Joor wird e weeneli anderscht wärde als sunscht. Y wott e bitz mee uss dämm uusehoole... y find, ass me d Fasnacht und s Fieber mee gspiire sott.

Du bisch quasi an jeedere Vorfasnachtsveraastaltig aazdräffe...
Jo, aber y no ebber wo mer drbyy hilft... sunscht wär das nit z schaffe. D Yysätz finde numme am Wucheänd statt und y mach jo näbebyy au no myni Aarbet fir d "News".

     
 

Wenn foosch do mit de Voorberaitige fir die Sändig aa ?

Wann beginnst Du mit den Vorbereitungen für diese Sendung ?

  Ariela:

D Blaanig vom Fasnachtsquerschnitt, stoot aigentlig im Dezämber scho. S isch jo praggdisch jeedes Joor s glych... mer wisse, wo mer unseri Kameras positioniere mien und geen wiirglig deert aane und luege n ys das aa.
S Bescht verwände mer denn fir d Highlights oder zem e Bricht z schryybe... und die gaz guete Daarbietige zaige mer denn in voller Längi im Querschnitt.

Die Planung vom Fasnachtsqerschnitt, steht eigentlich im Dezember schon. Es ist ja praktisch jedes Jahr das gleiche... wir wissen, wo wir unsere Kameras positinieren müssen und gehen wirklich zu den Veranstaltungen und schauen uns das an. Das Beste verwenden wir dann für die Highlights oder um einen Bericht zu schreiben... und die ganz guten Darbietungen, zeigen wir dann in voller Länge im Querschnitt.

     
 

Du bisch jo an dr Basler Fasnacht als aggdiivi Fasnächtlerin underwäggs und zwoor als Dambour...

  Ariela:

Jo aber dasch mittlerwyyle nit speziells me, mer hänn ganz vyl Fraue bi uns in dr Clique wo drummle. Y ha n-e elderi Schweschter wo pfyfft und ych ha immer ebbis anders mache welle als myni Schweschter, dorum ha n y aagfange mit drummle... das het mi mee graizt, als pfyffe.

     
 

Was beditet Dir d Fasnacht ?

  Ariela:

Y glaub, wenn me aggdiiv Fasnacht macht, denn isch d Liebi zue däre Stadt noonemol ganz anderscht. Wenn y brobier ebberem d Fasnacht z erklääre, wo nonie Fasnacht gmacht het, denn kunnsch aifach uff kai griene Zwyyg. Under Fasnächtler reedet me die glych Sprooch und s isch wie ne unsichtbaars Band, wo alli mitenand verbindet. Wärend dr Fasnacht isch die Stadt imene Ussnaamezuestand und alli mache mit... s isch aifach numme maagisch.

     
 

Wie lang machsch denn scho Fasnacht ?

  Ariela:

Syt y 6 Joor alt bi...

Wenn Du jetz eso uff Dyni Fasnachtszyt zruggluegsch... heschs Gfiil, ass sich d Fasnacht veränderet het ?
Y ha nit wiirglig s Gfiil, ass si sich d Fasnacht veränderet het. S git gwissi Fasnachtsreegle, wo mir scho als glains Kind yydrichteret woorde sin und doo draa muess me sich halte. Also wenn zem Byspiil ebber d Larve abzieht bevoor dr Dambourmajoor abgwungge het, denn macht mi das hässig, well me das aifach nit macht. Y glaub in dr Guggemuusig-Szeene het sich woorschyns scho mee veränderet, als in dr Clique-Szeene.

     
 

Wenn foot bi Dir d Fasnachtstimmig so richtig aa ?

  Ariela:

Friener isch d Fasnachtsstimmig bi unserne Marschiebige in dr "Lange Eerle" koo. Hit muess y saage, ass das Fasnachtsfieber scho vooreme Moonet (Novämber) koo isch... das het aber mit mynere Aarbet und de Voorberaitige uff e Fasnachtsquerschnitt z due.

     
 

Was isch in Dir voorgange, wo d Fasnacht im 2020 kurzfrischtig abgsait woorde n-isch ?

  Ariela:

(Langs Schwiige und Kopfschittle...) Das wird y nieme in mym Läbe vrgässe... y bi jo sällmol im Saal vom Roothuus gsässe, wo d Mediekonferänz stattgfunde het und y has aifach nit glaube kenne, was y do gheert ha. D Fasnacht isch eso ebbis hailigs in dääre Stadt und ass me d Fasnacht absaage wurd, hät y im Lääbe nie dänggt. Me hets zwoor gahnt, aber nit wiirglig fir meeglig ghalte. Nooeme halbe Joor het me zruggluegt und gfunde, ass es dr richtig Entschaid gsii isch.

     
 

Welles sin fir Dii d Grundpfyyler vo dr Fasnacht ?

  Ariela:

As alli am glyche Strang zien, as d Fasnacht dr Gsellschaft dr Spiegel aaneheebt und die unglaublig Kreativität, wo me wärend dääne 3 Daag uff dr Gass gsee ka.

     
 

Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?

  Ariela:

Mitem Lukas Engelberger oder dr Simonetta Sommaruga. Die mien sovyyl Entschaidige dräffe und y wurd si baidi au gärn emol leschtere gheere... zB. "S het mi aagschisse die Fasnacht abzsaage"... aifach dr wiirglig Mensch mit syne Emotioone kennelehre.

     
 

Was wirdsch an Männer nie vrstoo kenne ?

  Ariela:

Y glaub, ass y Männer seer guet vrstoo ka...

Hejo klaar...
Y glaub, ass d Männer besser yyschloofe kenne und das verstand y nit wieso...

Yyschloofe ???
Voorem Yyschloofe graise no eso vyyl Gedangge in mym Kopf umme, ass y aifach kai Schloof find und y glaub, ass d Männer die Gedangge besser vrdränge kenne als Fraue. Oder das "Schublaadedängge" vo de Männer... s isch eso faszinierend und wott y au gärn kenne ;-)

Und no ebbis... heeret emol uff mit dääne Männerklischees... Fraue sin no vyl schlimmer ;-)))))

     
  Wie goosch Du mit Kritik um ?
  Ariela:

Schlächt... aber y schaff an mir. Wenn me Eergyzig isch, denn faart Kritik vyl mee yy find y... aber ebbe, y schaff draa.

     
  Was erhoffsch Du Dir vom 2022 ?
  Ariela:

Y hoff, ass d Normalität bald wider zruggkoo wird. Y bi no soo jung und mecht no eso vyyl Sache mache, ooni driiber noodängge z miesse, ob s jetz OK isch.

     
 

Was hesch vo dääre Corona Zyt mitgnoo ?

  Ariela:

Y waiss jetz, was e Epidemioloog oder e Epidemioloogin isch... sin mer doch eerlig, dass hän die weenigschte voor dr Pandemie gwisst ;-). Bevoor Corona koo isch, ha n y uff Netflix e Doku iiber d Entsteehig vonere Pandemie aagluegt... und was y doo mitnimm isch, ass me nit iber ebbis reede bzw. diskutiere sott, wenn me sich im Voorfäld nit driiber informiert het. Me het scho im Voorfäld gwisst, ass wenn emol e Pandemie kunnt, si genau eso ablaufe wird, wie mers jetz hänn.

     
  No e baar Schlaagweerter, bitte numme mit aim Satz beantwoorte...
  Basel...

Wird immer myni absoluti Nr. 1 Haimat blyybe, egaal wo s mi aaneschloot...

  Ziiri...

Immer mindeschtens 3x schlächter als Basel...

  Männerschnuppe...

Gits effeggdiiv...

  Fasnachtsviirus...

Hets Di aimool phaggt, lossts Di nimme loos...

  TeleBasel...

E Lehr firs Lääbe...

  Fasnacht 2022...

"Mer wei mol luege" ;-)

Vyyle Dangg fiir Dyni Antwoorte