Sven Schwob - Gschäftsfiehrer vo Wacker&Schwob AG (Wacker Käskiechli)
   
 

 

1928, also genau vor 94 Joor, ischs beriemte Wacker Käskiechli vom Gaston Wacker erfunde woorde… hets wiirglig vorhäär no kaini Käskiechli gää ?

  Sven:

Das waiss y nit und miesst me recherchiere, aber e Käskiechli isch aigentlig e Quiche Lorraine und kunnt ussem Franggryych... ob miir jetz die eerschte gsii sin wo das in dr Schwiz produziert hänn, ka niemer me eso rächt saage.

S isch uff jeede Fall syt 1928 bekannt...
Also syt me 1928 in Basel zem eerschte Mool an dr Heerbschtmäss mitgmacht het, ganz sicher...

     
 

Was jo ganz indressant gsii isch, ass dr Gaston Wacker voor dr Gebuurt vom Käskiechli, aigentlig Kinderwääge verkauft het… wie isch denn drnoo die Verbindig zem Käskiechli koo ?

  Sven:

Die Verbindig isch duure guete Frind vom Gaston Wacker entstande, wo Begger gsii isch. Gmainsaam hänn si denn das Käskiechli entwigglet, wobyy d Initiaalzindig nadyrlig scho vom Begger här koo isch. D Idee isch gsii, ass me de Kunde ebbis aabiete und denn in e Gspreech iiber Kinderwääge het verwiggle kenne. Speeter het me denn die Käskiechli au in d Gaschtronomie vrkauft und an dr Muschter- und Heerbschtmäss als Alternatiive zem Glepfer aabotte.

     
 

1966 hänn die Käskiechli als soogenannti "Swiss cheese-tarts" sogaar dr Wääg noo Montreal an d Wältusstellig gfunde… wie isch denn daas drzue koo ?

  Sven:

Me waiss es hit nimm eso genau, wieso me deert mitgmacht het... s git laider au kaini Aagoobe me doo drzue. Me het jo scho im 1964 mit 3-4 Restauratioone an dr EXPO in Lausanne mitgmacht und vermuetlig het me denn uffgrund vo dämm, d Familie Wacker fir d Wältussstellig in Montreal aagfroggt.

Ka me denn hit no die "Swiss cheese-tarte" in Kanada kaufe ? Waiss me das ?
Nai, me isch jo an dääre Wältussstellig gsii und aaschliessend anere Mäss, wo e ganzes Joor lang gange n-isch, aber dasch halt wie bi andere Mässe au, e brootsloosi Kunscht gsi.

     
 

Und denn isch 1981, also voor 30 Joor, Dyni Familie drzue koo und d Firma"Wacker & Schwob" isch entstande...

  Sven:

Dr Gaston Wacker isch e Frind vo mym Babbe Werner Schwob und no e bessere Frind vo mym Getti Ärnscht Schwob gsi. Dr Ärnscht Schwob und dr Gaston Wacker sin zämme in d Schuel und hänn sich vo deert häär guet kennt und eso d Verbindig zue mym Babbe häärgstellt. My Babbe het sich welle verändere und das het dr Gaston Wacker mitgriegt... und iirgendwenn isch denn emol die Idee koo, ass me ebbis zämme mache kennt. Dasch denn dr Yystiig gsii und 1984 isch denn d Firma "Wacker & Schwob" entstande und 1987 isch d AG grindet woorde.

Aber Dyni Familie het jo immer ebbis mitem Gaston zdue kaa oder ?
My Groossbabbe het immer Handoorgele gspiilt in de Wacker-Restaurant und my Groossmamme het an de Mässe als Buffetdaame bim Wacker gschafft... und in de 40er und 50er Joore hänn miir au scho bi dr Familie Wacker mitgholfe.

     
 

Ischs fir Dii vo Aafang aa klaar gsii, ass emol in d Fuessstapfe vom Babbe stoo wurdsch ? Oder hets dieff in Dym Härze vellicht sogaar e andere Wunsch-Draumbruef gää ?

  Sven:

Met het nadyrlig immer ebbis anders welle mache, dasch esoo. Noo dr KV Lehr, ha n y e Schnupperlehr als Koch im Rest. "Landgasthof" gmacht. Nooem Militär, bi n y denn noo Hawaii gange zem Änglisch lehre und das het mer nadyrlig seer gfalle. 1992 bi n y denn ainewäg zruggkoo und ha denn an dr Heerbschtmäss, d Ständ uffbaut und eso bi n y denn langsaam dryykoo.

Aber Du heschs nie bereut, ass vo Hawaii zruggkoo bisch oder ?
Nai... mer hänn nadyrlig 1997 / 1998 schweeri Joore ka, wo s Mässegschäft zrugggange n-isch und au speeter wo uss gsundhaitligge Grind vom Gaston Wacker und mym Babbe, s ganze au no in Mitlaideschaft zooge het. Im Joor 2000 isch me denn voor dr Entschaidig gstande, ob me komplett uffheere oder ebbis ganz neys mache sott... und dasch denn fir mii d Initiaalzindig gsii, ass mer unseri Baggwaare nit numme in Basel, sondern in die ganz Schwiz vrdryybe mien. Dasch dr Grundstai gsii, was mer hit aigentlig mache.

     
 

S git jo ganz vyyl Käskiechli vo andere Häärsteller, aber y muess eerlig saage, ass die vo Eych aifach die Beschte sin, anderscht schmegge, e ideaali Greessi hänn und aifach unglaublig feyn sin. E Käskiechli het jo nit eso vyyl verschiideni Zuedaate... was macht denn dä Underschiid uss ?

  Sven:

S Käskiechli isch halt fir vyyli Häärsteller e Induschtriiproduggt woorde und sobald me ebbis induschtriell häärstellt, schmeggts aifach anderscht, als wenns no vo Hand gmacht wird. Das liggt am Häärstelligsprozäss, oder au an dr Qualität vom Rohmateriaal, wo me firs Produggt bruucht... verwändet me schlächti Qualität, denn meergt me das au im Ändproduggt. Miir mache hit no vyyl vo Hand und kaufe qualitatiiv hochwärtigs Materiaal yy und denn gits au e guets Ändproduggt.

Y nimm aa, au bim Käs...
Im Käsberaich ka me kaini groosse Gimp mache und duur dr Schutz vo AOP isch nadyrlig d Qualität no heecher woorde. S git aber immer no Abstuefige bim Käs und denn kunnts no druff aa, wie me dr Käs schnyydet, ob är grafflet isch oder pulverisiert, etc. oder nimmt me Induschtrie Aier oder Freyland Aier, etc. all daas spiilt nadyrlig e Rolle bi dr Produggdioon.

     
 

Wie vyyl Produggdioonsschritt bruchts, bis e Käskiechli feertig isch ?

  Sven:

Aigentlig ischs e ganz aifachs Rezäpt, aagfange vom Daig bis zer Fillig und do ka me nit vyyl falsch mache, usser me lossts z lang im Oofe. S bruucht Käs, me brucht e Guss uss verschiidene Zuedaate und denn ka mes aigentlig bagge und grad verkaufe. Hit dien mers aifach no Schogggfriere, dh. mer beschleen s Produggt mit ganz glaine Yyskristall und eso wirds vo Usse noo Inne glyychmässig gfroore. Das git e Schutzbildig und macht e Zytstop, dh. wenn me s wider uffdaut, isch s genau eso, wies voorem yygfriere gsii isch und me muess es numme no waarm mache.

     
     
 

Iir stellet jo nit numme Käskiechli häär, sondern sin au Märtfierer vo Käs- und Ziibelewaie… wie vyyl Lyt schaffe denn bi Eych im Betriib ?

  Sven:

Usserhalb vo dr Saison sin s 7 Lyt und jetz im Winter sin mer 8.

     
 

Und denn kunnt ändlig d Fasnacht. Wie beraitet me sich uff esoone Groossaaloss vor ? Schafft me denn im 3-Schicht-Betriib ?

  Sven:

Bi uns ischs aigentlig entspannt… mer hänn vo 06:00 bis 17:00 die normaal Daagesproduggdioon im 2-Schicht-Betriib und denn kunnt halt no voor dr Fasnacht e 3. Schicht drzue, wo bis am 19:00 goot, ass d Maschinerie entsprächend nookunnt. E Käswaie goot zem Byspiil vyyl lenger zem bagge, als e Ziibelewaie, wells halt vo dr Masse här scho vyl mee isch… e Käswaie isch fascht 1400g schweer. Wenns wiirglig guet lauft, denn muess me halt au emol e Samschtig dryydrugge, aber ab April / Mai ischs denn wider e weeneli entspannter.

Wenn isch denn d Hochsaison bi Eych ?
Unseri Hauptsaison goot vom Oggdoober bis Ändi Meerz / Aafang April… inklusiive Heerbschtmäss, Wienachtsmärt, Voorfasnacht und Fasnacht und das frisst nadyrlig e huffe Energie, aber me ka sich denn im Summer wider erhoole.

     
 

Und denn isch im 2020 die Absaag vo dr Fasnacht koo, nadyrlig e groossi Katastrophe fir Eych gsi…

  Sven:

Jo… am Frytig voor dr Fasnacht am 12:15 isch die Absaag koo und do isch beraits scho ¾ vo dr Waar an d Kunde ussgliiferet gsii… do mag y mi no seer guet draa erinnere. Am 12:16 het denn scho s eerscht Delifon glitte "Jä loos, Du kasch Dyni Waie wider abhoole".

Goot das denn ? Y main, me het jo die Waar bstellt und Du kasch jo au nit drfiir, ass d Fasnacht abgsait woorde n-isch…
Markus, dasch e schwiirigi Situatioon gsii und mer hänn e "Goodwill" zaigt, wo nit jeedi Firma gmacht het. S groossi Gligg isch sicher no gsii, ass wärend dääre "Fasnachtszyt", e bombe Wätter gsii isch und eso hänn ganz vyl Kunde am Rhy unde iiri Waar bhalte und ainewäg guet verkaufe kenne. S isch wiirglig seer guet gloffe und vyl Kunde hänn sogaar no noobstellt. Aber mer hänn ainewäg ebbe 3500 Waie miesse zrugghoole, aber hänn praggdisch alles wider im 2021 an Privatkunde verkaufe kenne, do isch e riisigi Solidarität gsii und das het ys nadyrlig seer gfrait.

     
 

Bisch Du e n-aggdiive Fasnächtler ?

  Sven:

Y bi syt de 90er Joor, Dambour bi dr Dambouregrubbe "Neandertaler".

     
 

Was beditet Dir d Fasnacht ?

  Sven:

Seer vyyl… d Larve aazieh, dr Kessel umhängge, uff dr Strooss musiziere und das aifach gniesse, wie das läärmt und duet. Die Stimmig wo do heerscht, isch fir mi immer seer faszinierend gsii und dasch au hit no eso. Mit de Frinde yystoo, d Larve aazieh und loosbrätsche… do isch me aifach z friide.

Und me ka sich dryybe loo und muess 3 Daag lang nimm ans Gschäft dängge…

     
 

Gits bi Dir no e Fasnachtsstimmig, oder bisch Du mit Dynere ganze Voorberaitig und Produggdioon scho eso im "Fluss", ass gaar kai Fasnachtsstimmig me uffkunnt ?

  Sven:

Doch, doch… dr "Vogel Gryff" isch esoone Momänt, wo me dusse gheert, ass d Fasnachtsstimmig scho langsam doo isch. Wenn denn s Bryysdrummle und s Bryyspfyffe kunnt, denn goots langsam loos, well y do amigs immer wider mitmach. Y will e guete Dambour sii und ka nit aifach aanestoo, d Stäggli in d Hand nää und s Fäll stryychle. Wenn y nimm top drummle ka, wird’s irgendwenn langwyylig fir mii… y muess gfoorderet wärde.

     
 

E Verschiebig vo dr Fasnacht… isch das e Thema fir Dii ?

  Sven:

S isch aifach nit s glyych. Im Summer go "haize" isch nadyrlig scho gail… aber im Summer e Fasnacht mit Larve mache glaub y nit, ass das ebbis wär. S bruucht die Stimmig, s bruucht die Thämperatuure und s bruucht die Aigehait, ass me zeerscht schwitzt und denn friert, wenns schneyt oder saicht.

Fir mii isch Fasnacht denn, wenn Fasnacht isch…
Und me ka nit Voorfasnacht mache und denn noo 2-3 Moonet Pause wytermache, me muess im "Flow" blyybe… das goot sunscht nit.

     
 

Mit wellere beriemte Perseenligkait (ka au scho gstoorbe sii), wurdsch gärn emool e scheene Oobe miteme feyne zNacht verbringe und aifach numme plaudere  ?

  Sven:

Mitem Moritz Sutter zem Byspiil… är isch fir mii e Perseenligkait gsii wo s gschafft het, uss däre Zyt uuse e Fluuggsellschaft z grinde… das wär hit unvoorstellbaar.

     
 

Was wirdsch an Fraue nie verstoo kenne ?

  Sven:

Das ha n y mi au scho gfroggt ;-). Y kumm aigentlig immer seer guet uss mit Fraue… aber was me vellicht nit eso verstoo ka isch, ass es amigs e weeneli länger goot bis me e klaari Andwoort griegt, wo me ebbis drmit aafoo kaa… e "Jo" ka e "Nai" sii oder umgekeert.

     
 

Welli 3 Sache wottsch unbedingt no erlääbe in Dym Lääbe ?

  Sven:

Raise gheert nadyrlig drzue, au wenns momentan e weeneli schwiirig isch… als Zwaits bi n y grad an mym Flugbrevet und das wott y nadyrlig erfolgryych feertig mache und als Dritts wott y gärn uffem Meer seegle… das Frey und Unabhängig syy, gfallt mer seer.

     
 

Wenn platzt em Sven emol dr Kraage ?

  Sven:

Wenn y im Gschäft under Drugg bi, denn kas schonemool bassiere… aber dasch seer sälte, well y relatiiv ussglyche bi.

Und bi was goot Dir s Häärz uff ?
Bi gwisse Momänt an dr Fasnacht… oder wenn y e scheens Bild aalueg, wo n y nonie gsee ha oder amene See uffeme Stai sitze und aifach die scheeni Stimmig gniesse.

     
  Was erhoffsch Du Dir vom 2022 ?
  Sven:

As mer hoffentlig e scheeni Fasnacht gniesse kenne… und nadyrlig, ass sich die Pandemie-Laag entspannt und e "mitem Virus lääbe" git, denn e "geege daas lääbe" isch kai Lääbe und goot au nit. As mer die Situatioon in Griff griege, glaub y nit und ka n y mer au nit voorstelle.

     
  Was hesch uss dääre Pandemie mitgnoo ?
  Sven:

Die Verlangsaamig und Entschleunigung het seer guet doo. Au d Vernunft mit weeniger lääbe z kenne… me muess au nit immer alles haa.

     
  No e baar Schlaagweerter, bitte numme mit aim Satz beantwoorte...
  Basel...

Haimat, Woonoort, gueti Frinde, vyyl Frindschafte und Fasnacht…

  Zürich...

Au gueti Frinde und e Sprooch, wo n y nie vrstoo wird… voor allem s Stadtziiri-Ditsch… e absoluti Katastroofe und e aggressiivi Sprooch par excellence. Guete Frinde ka n ys diräggt saage, ass es e Scheiss isch und sunscht aifach als Spruch: "Ussland"…

  Nitfasnacht...

Unvoorstellbaar, aber mittlerwyyle scho fascht voorstellbaar und gsellschaftligge Dood...

  Fasnachtsvirus...

Wenn de machsch, muesch…

  Roosekiechli...

Syt iiber 60 Joor e Draditioon, e top Produggt und e "Must" an dr Heerbschtmäss…

  Fasnacht 2022...

Scheen und mach y. My Goschdyym wär baraat und d Drummle isch gschränggt… y muess numme no looslaufe…

  Die perfäggt Schuumkroone...

S isch e Bockbier gsii, wells aifacher zem braue gsii isch als e Pils und het seer guet gschmeggt ;-)

Vyyle Dangg fiir Dyni Antwoorte